આ મંદિર શિવપુત્ર કાર્તિકેયનું સૌથી મોટું મંદિર કહેવાય છે, મંદિર સુધી પહોંચવા માટે ચઢવા પડે છે આટલા પગથિયાં.
આપણા દેશમાં ઘણા પ્રાચીન મંદિરો છે, તે બધાની સાથે અલગ અલગ માન્યતાઓ અને પરંપરાઓ જોડાયેલી છે. આવું જ એક મંદિર તમિલનાડુના ડિંડીગુલ જિલ્લા (Dindigul) માં પલની (Palani) ખાતે પણ છે, જે અરુલ્મિગુ દંડાયુધપાણી સ્વામી મંદિર (Arulmigu Dhandayuthapani Swamy Temple) તરીકે ઓળખાય છે. આ મંદિરમાં શિવપુત્ર સ્વામી કાર્તિકેયની પ્રતિમા સ્થાપિત છે. સ્વામી કાર્તિકેય અહીં મુરુગન તરીકે ઓળખાય છે. આ મંદિરનો ઈતિહાસ ઘણો જૂનો છે. આગળ જાણો આ મંદિરનો ઈતિહાસ અને અન્ય ખાસ વાતો.
મુરુગન સ્વામીની મૂર્તિ ઝેરી સામગ્રીથી બનેલી છે :
એવું કહેવાય છે કે અરુલ્મિગુ દંડાયુધપાણી મંદિરમાં સ્થાપિત મુરુગન સ્વામીની મૂર્તિ 9 અત્યંત ઝેરી પદાર્થોને મિશ્રિત કરીને બનાવવામાં આવી છે. આયુર્વેદમાં આ ઝેરી પદાર્થોને ચોક્કસ પ્રમાણમાં મિશ્ર કરીને દવાઓ બનાવવાની પ્રક્રિયાનું પણ વર્ણન મળે છે. મંદિર પરિસરની એક તરફ ઋષિ બોગારની સમાધિ છે. બોગાર ઋષિ આયુર્વેદના મહાન વિદ્વાન હતા. એવું માનવામાં આવે છે કે ઋષિ બોગારે મુરુગન સ્વામીની મૂર્તિ બનાવી હતી.
આવો છે મંદિરનો ઈતિહાસ :
મુરુગન સ્વામીના આ મંદિરનો ઈતિહાસ ઘણો જૂનો છે. તેનું વર્ણન સ્થળ પુરાણ અને તમિલ સાહિત્યમાં જોવા મળે છે. અહીંનું વર્તમાન મંદિર પાંચમી-છઠ્ઠી સદી દરમિયાન ચેર વંશના રાજા ચેરામન પેરુમલ દ્વારા બનાવવામાં આવ્યું હતું. એવું કહેવાય છે કે મુરુગન સ્વામી પોતે રાજાના સ્વપ્નમાં આવ્યા હતા અને રાજાને આ સ્થાન પર તેમની પ્રતિમા હોવાની વાત કહી હતી. તે પછી રાજાએ અહીં મંદિરની સ્થાપના કરી. આ પછી પાંડ્ય વંશના રાજાઓએ પણ આ મંદિરને વિશાળ સ્વરૂપ આપ્યું હતું.
મંદિરનું સ્વરૂપ અને વિશેષતાઓ :
અરુલ્મિગુ દંડાયુધપાણી મંદિર શિવપુત્ર કાર્તિકેયનું સૌથી મોટું મંદિર કહેવાય છે. મંદિર સુધી પહોંચવા માટે 689 પગથિયાં ચઢવા પડે છે. આ મંદિરના ગોપુરમને સોનાનો ઢોળ ચઢાવ્યો છે. ગર્ભગૃહમાં કોઈને પણ પ્રવેશ આપવામાં આવતો નથી, પરંતુ તેમ છતાં પણ અહીં શ્રદ્ધાળુઓની સંખ્યા યથાવત છે. આ મંદિરની બીજી ખાસ વાત છે અહીંનો પ્રસાદ જેને પંચતીર્થમ પ્રસાદમ કહેવામાં આવે છે. આ પ્રસાદ કેળા, ઘી, એલચી, ગોળ અને મધમાંથી બનાવવામાં આવે છે. આ પ્રસાદને ભૌગોલિક સંકેત અથવા GI ટેગ પણ આપવામાં આવ્યો છે.
કેવી રીતે પહોંચવું?
પલનીનું સૌથી નજીકનું એરપોર્ટ કોઈમ્બતુર ઈન્ટરનેશનલ એરપોર્ટ છે, જે અહીંથી લગભગ 100 કિલોમીટરના અંતરે આવેલું છે. અહીંથી તમે રોડ માર્ગે સરળતાથી મંદિર સુધી પહોંચી શકો છો.
પલની રેલ્વે સ્ટેશન કોઈમ્બતુર-રામેશ્વરમ રેલ લાઇન પર આવેલું છે. અહીં પહોંચવા માટે મદુરાઈ, કોઈમ્બતુર અને પલક્કડથી ટ્રેનો દોડે છે.
રોડ માર્ગ દ્વારા પણ પલની સરળતાથી પહોંચી શકાય છે, કારણ કે તમિલનાડુ રાજ્ય પરિવહનની બસો ઘણા મોટા શહેરોમાંથી સીધી પલની સુધી આવે છે.
(ડિસ્ક્લેમર : અહીં આપેલી માહિતી સામાન્ય ધારણાઓ અને માહિતી પર આધારિત છે. અમે તેની પુષ્ટિ કરતા નથી.)
આ માહિતી એશિયા નેટ ન્યુઝ અને અન્ય નેશનલ ન્યુઝ એજન્સીઓના ન્યુઝ આર્ટિકલ માંથી સંપાદન કરી લીધેલ છે.
