રાજ આજે બપોરે જ ઓફિસેથી આવ્યો હતો. પત્નીએ જોયું કે રાજ ખૂબ જ પરેશાન દેખાઈ રહ્યો છે, એટલે તરત પૂછ્યું,
શું થયું? તમે ઠીક છો ને?
હા હું ઠીક છું પણ…..
પણ શું? વચ્ચેથી ટોકતા રાજની પત્ની નિધિએ પૂછ્યું.
રાજના કપાળ પર ચિંતાની રેખાઓ દોડી રહી હતી અને એ જ રેખાઓ પર પરસેવાના ટીપાં તરતા હતા જાણે કે તે કંઈક લખીને નિવેદન આપવા માંગતા હોય.
“તમે કાંઈ બોલતા કેમ નથી?” નિધિએ ફરી એકવાર પૂછ્યું. પણ રાજ હજુ જવાબ આપવાની સ્થિતિમાં દેખાતો ન હતો. તેમ છતાં તેણે હિંમતથી કહેવાનો પ્રયત્ન કર્યો,
“તારા પપ્પાનો ફોન આવ્યો હતો….”
“બધું બરાબર તો છે ને?” અધવચ્ચે જ અટકાવતા તેની પત્નીએ કહ્યું.
“હા બધું… બધું બરાબર છે. તેઓ માત્ર એટલું જ કહેતા હતા કે કેતનનો તેમની સાથે ઝઘડો થયો છે અને તે તેમનાથી દૂર રહેવા માંગે છે.
“કેતનનું મગજ ખરાબ થઇ ગયું છે કે શું? લગ્નને 3 મહિના પણ થયા નથી અને માતા-પિતાથી અલગ થવાની વાત કરી રહ્યો છે. નિધિએ ગુસ્સામાં કહ્યું.
તેણીને શાંત કરવા માટે, રાજે તેણીને સમજાવવાનો પ્રયાસ કર્યો.
કદાચ કેતન સાચો છે. તારા જ માતા-પિતાએ કંઈક ખોટું કર્યું હશે.
શું તમે પણ? હું બાળપણથી મારા માતા-પિતાને ઓળખું છું. તેઓ ખોટા ન હોઈ શકે. જેમણે મને ઉછેરીને આટલી મોટી કરી, શું તમને લાગે છે કે તેઓ ખોટા હોઈ શકે છે?
પરંતુ આપણે આ બાબતમાં શું કરી શકીએ?
મારે હવે કેતન પાસે જવું છે. હું તેને પૂછીશ કે તે આવું કરવાની હિંમત કેવી રીતે કરી?
પણ આ વખતે જવું યોગ્ય રહેશે?
મને એ બધું ખબર નથી. મારે જવું છે તો જવું છે બસ.
આ સ્થિતિમાં રાજ કોઈ પણ રીતે નિધિને રોકી શક્યો નહિ. તેથી તેણે તેની સાથે જવાનું નક્કી કર્યું.
નિધિ અને રાજના લગ્નને 8 મહિના થયા હતા. કેતન નિધિનો ભાઈ હતો. તેના લગ્નને 3 મહિના જ થયા હતા.
નિધિ તેના પિયરે પહોંચી. રાજ કારમાંથી નીચે ઉતરી રહ્યો હતો એટલા સમયમાં નિધિ દરવાજેથી ઘરની અંદર દાખલ થઇ.
નિધિના પિતા ડ્રોઈંગ રૂમમાં બેઠા હતા. નિધિ ગુસ્સામાં ધ્રૂજતી તેમની પાસે પહોંચી અને બોલી,
“કેતન ક્યાં છે? લાગે છે તેનું મગજ ખરાબ થઇ ગયું છે. તેની આટલી હિંમત કેવી રીતે થઈ કે તેણે તમારાથી અલગ થવાનો વિચાર પણ કર્યો?
નિધિના પપ્પા નવાઈ પામ્યા અને નિધિના ચહેરા તરફ જોયું પછી ચિંતિત સ્વરે કહ્યું,
“નિધિ, દીકરા તું શું બોલે છે? તને કોણે કહ્યું કે કેતન આપણાથી અલગ થવા જઈ રહ્યો છે?”
ત્યાર બાદ કેતનની પત્ની રસોડામાંથી બહાર આવી.
પિતાનો પ્રશ્ન અને કેતનની પત્નીને જોઈને નિધિ એક ક્ષણ માટે નિરર્થક બની ગઈ. તેને સમજાતું નહોતું કે આ બધું ખરેખર થઈ શું રહ્યું છે કે પછી તેને કોઈ મોટી ગેરસમજ થઈ ગઈ છે. પછી તેણીએ જોયું કે રાજ હજી ત્યાં પહોંચ્યો નહોતો. આથી તેણે પાછળ ફરીને તરત જ દરવાજા તરફ જોયું. તેણીએ રાજને ત્યાં ઊભો જોયો. તે કાંઈ પૂછે તે પહેલા. રાજ બોલ્યો,
“હું ખોટું બોલ્યો.”
“પણ કેમ?”
હવે નિધિની સાથે તેના પિતા અને કેતનની પત્ની પણ સમજવા માંગતા હતા કે શું થઈ રહ્યું છે? થોડી વારમાં નિધિની માતા પણ પોતાના બેડરૂમમાંથી બહાર આવી.
“કારણ કે મારા માતા-પિતા પણ ખોટા ન હોઈ શકે. હું પણ બાળપણથી તેમની સાથે રહ્યો છું. જરૂર ભૂલ તારી હોઈ શકે છે.” કેતને કહ્યું.
નિધિ બધું સમજી ગઈ. તેને ખ્યાલ આવી ગયો હતો. નિધિની આંખો આંસુઓથી ભરાઈ આવી અને તેણે ધ્રૂજતા અવાજે કહ્યું, આપણે આજે જ મમ્મી-પપ્પાને ઘરે લાવીશું.
પરંતુ તેઓ ગયા જ ક્યાં હતા?
તમે શું કહેવા માંગો છો?
મને ખબર હતી કે, તું ટૂંક સમયમાં જ સંબંધોનું મહત્વ સમજી જશે. તેથી જ હું તેમને મોટી બહેનના ઘરે મૂકી આવ્યો હતો. આપણે ઘરે જઈએ તે પહેલાં તેઓ ઘરે પહોંચી જશે.
શું તમે પણ….
પછી નિધિએ રાજને ગળે લગાડ્યો. ત્યારબાદ બંને પોતાના ઘરે જવા રવાના થયા હતા.
આ જ છે સંબંધોનું મહત્વ. તમે જેવું તમારા માટે ઇચ્છો તે રીતે તમારા જીવનસાથી સાથે પણ વ્યવહાર કરો. જીવન પોતે જ આનંદમય બની જશે. અને સાસુ સસરાએ પણ વહુ સાથે પારકી હોય એવો વ્યવહાર ન કરવો જોઈએ. તો જીવનની ગાડી સારી રીતે ચાલી શકશે.
