પવિત્ર શ્રાવણ માસમાં ચંદ્રમૌલી શિવ શંકરના ચરણે મતિ અનુસાર રચેલ કાળું-ઘેલું કાવ્ય પુષ્પ ધારું છું.
ભોલા ભંડારી.
જય જય જય ભોલા ભંડારી ,[૨]
આસુતોષ કર સહાય અમારી ,
ભાલે અર્ધચંદ્ર અતિ સુંદર ,
જટાજૂટ માં ગંગા ધારી .
જય જય જય ભોલા ભંડારી .[૨]
ડમરુ માં વેદ-સ્વર ગાજે ,[૨]
કંઠે તારા ભુજંગો રાજે ,
વ્યાઘ્રચર્મ ને ભભૂત સોહે ,
સાથે છે ત્રિશુલ ભય હારી ,
જય જય જય ભોલા ભંડારી .[2]
નીલ છે કંઠ હલાહલ ધારી ,[૨]
ત્રીજું નેત્ર ‘કામ’દે બાળી ,
કૈલાસે છે વાસ તમારો ,
ભૂત ગણો કરતા કિલકારી ,
જય જય જય ભોલા ભંડારી .[૨]
સદા કમંડળ નિકટ તમારી ,[૨]
ભાલે તુજ ત્રિપુંડ ત્રિપુરારિ ,
સ્મશાન માં પણ વાસ તમારો ,
વાહન નંદી ,બૈલ સવારી ,
જય જય જય ભોલા ભંડારી .[૨]
થાય બિલીપત્રે તુજ સેવા ,[૨]
રુદ્રાક્ષો પણ શોભિત કેવા ,
દૂધ અને જળ ના અભિષેકો ,
ભોલેનાથ ,ત્રિલોચન ધારી ,
જય જય જય ભોલા ભંડારી .[૨]
કેદારનાથ,સોમનાથ ,નાગેશ્વર ,[૨]
મહાકાલ ,વિશ્વનાથ ,રામેશ્વર ,[૨]
મલ્લિકાર્જુન ,બૈજનાથ ,ત્રમ્બકેશ્વર ,[૨]
ભીમાશંકર ૐકાર ,ઘુષ્મેશ્વર ,[૨]
જ્યોતિર્લિંગ બાર પ્રભુ તારા ,
રહ્યા ભારત-ભૂમિ ઉઘ્ધારી .
જય જય જય ભોલા ભંડારી .[૨]
લિંગ સ્વરૂપે તારું પૂજન ,[૨]
ભાંગ-ધતૂરા થી તુજ અર્ચન ,
સંહારક તું , ઉધ્ધારક તું
તું છે શંકર ભવભય હારી ,
જય જય જય ભોલા ભંડારી .[૨]
વામ પક્ષ છે પાર્વતી માતા [૨]
ગણેશ કાર્તિકેય બે ભ્રાતા [૨]
લાભ -શુભ છે પૌત્રો તમારા ,
રિદ્ધિ-સિદ્ધિ વહુઆરુ તમારી ,
જય જય જય ભોલા ભંડારી .[૨]
શ્રાવણ માસ તમારો પ્યારો ,[૨]
સોમવાર નો દિન અતિ સારો ,[૨]
છોરું સામે ,જરા જોજો ભગવન ,
બુદ્ધિ મુજબ કરું ભક્તિ તમારી ,
જય જય જય ભોલા ભંડારી.(2)
– ઓમપ્રકાશ વોરા, અમદાવાદ.
