લઘુકથા – “ટિકિટ” :
– માણેકલાલ પટેલ.
રાકેશ ઓફિસે જવા નીકળ્યો એટલે એની પત્નીએ કહ્યું : ” બારી પાસે નંબર આવે એ રીતે ટિકિટ લેજો. ”
પાડોશી પ્રવીણને પણ આજ રાતના જ અમદાવાદ જવા નીકળવાનું હતું. એણે રાકેશને પૂછ્યુ : ” રમાભાભી એકલાં જ જવાનાં છે? ”
” હા. રક્ષાબંધન આવે છે ને? ”
” તમે નથી આવવાના? ”
” મારે ઓફિસનું કામ છે એટલે બે દિવસ પછી આવું છું. ”
” મારે પણ આજે નીકળવું છે.” પ્રવીણે રમા સામે જોઈને કહ્યું : ” મારી પણ ટિકિટ લેતા આવજોને? ”
પછી પ્રવીણ ઓફિસે જવા નીકળી ગયો.
સાંજે પ્રવીણ આવ્યો ત્યારે રાકેશનું ઘર બંધ હતું.
આઠેક વાગે રાકેશે આવી પ્રવીણને ટિકિટ આપતાં કહ્યું : ” સાતની લક્ઝરી બસમાં રમાને મૂકતો આવ્યો અને દસ વાગ્યાની બસની તમારી ટિકિટ લેતો આવ્યો છું, પ્રવીણભાઈ ! તમારો ધક્કો બચી ગયો. ”
પ્રવીણ ટિકિટ સામે એકીટસે જોઈ રહ્યો.
– માણેકલાલ પટેલ.
